Rauðholt á Selfossi er fallegasta gatan í Árborg 2026. Skilti sem staðfestir það var afhjúpað í götunni síðdegis í dag, á bæjarhátíðinni Sumar á Selfossi.
Hefð er fyrir því að elsti og yngsti íbúi götunnar séu heiðraðir áður en þeir afhjúpa skiltið. Elsti íbúinn í Rauðholti er Sigurdór Karlsson, fæddur 23. desember 1942, en hann hefur búið í Rauðholti 9 í 59 ár ásamt konu sinni, Helgu R. Einarsdóttur. Sá yngsti er Bjarnþór Grétarsson, fæddur 23. júní 2017, sem býr í Rauðholti 7. Foreldar hans eru Hugborg Kjartansdóttir og Grétar Magnússon. Þeir Sigurdór og Bjarnþór fengu blómvendi og afhjúpuðu síðan skiltið.
Umhverfisnefnd Árborgar afhendir þessi verðlaun árlega og barst nefndinni fjöldi tilnefninga í ár. Rauðholt er nýuppgerð gata þar sem komið var fyrir gönguleiðum, hjólastígum og gróðri. Hún var valin því hún er heilt yfir snyrtileg og falleg gata í grónu umhverfi. Aðeins fjögur íbúðarhús eru við Rauðholt og íbúar götunnar eru þrettán talsins.
Örn fékk umhverfisviðurkenninguna
Við setningu Sumar á Selfossi í gærkvöldi veitti umhverfisnefndin fern önnur verðlaun; fyrir snyrtilegasta fyrirtækið, fallegasta garðinn, fallegasta fjölbýlið og umhverfisviðurkenningu Árborgar 2026.
Fallegasta fyrirtækið er Sjávargata Villa við Búðarstíg 19c á Eyrarbakka. Þar er rekin ferðaþjónusta með gistiaðstöðu fyrir hópa. Eigandi hússins er Hinrik Þorsteinsson og hefur hann unnið að því að klára húsið síðustu þrjú ár. Húsið var tekið í notkun síðsumars 2025 og var mikill metnaður settur í að hafa allt sem glæsilegast, bæði hús, lóð og aðkomu í einstöku umhverfi.
Fallegasti garðurinn er Sigtún 7 á Selfossi. Þar búa Þorvarður Hjaltason og Ólafía Sigurðardóttir. Garðurinn var valin úr hópi margra frambærilega garða en hann hefur vakið athygli fyrir fallega og gróna lóð í eldri hverfum sveitarfélagsins.
Fallegasta fjölbýlið er Tryggvagata 10-12 á Selfossi. Um er að ræða nýbyggingar frá JÁVERK en þar er allur frágangur lóðar til mikils sóma og lóðin skemmtileg og vel hirt svo eftir er tekið. Mikill metnaður var settur í að fella hús og lóð að nærliggjandi umhverfi.
Umhverfisviðurkenning Árborgar kom síðan í hlut Arnar Óskarsson, formanns Skógræktarfélags Selfoss. Örn hefur víða komið við í umhverfismálum sveitarfélagsins. Hann hefur verið í forsvari fyrir Skógræktarfélag Selfoss og uppbyggingu í Hellisskógi í langan tíma. Það er vaxið upp útivistarsvæði með fjölbreyttum trjágróðri og gönguleiðum sem nýtist gestum þess allt árið. Örn stóð einnig fyrir trjáplöntun á lóð Fjölbrautaskóla Suðurlands í áraraðir og þar er nú risinn myndarlegur skógur í hjarta bæjarins. Örn og Kristín Runólfsdóttir kona hans búa við Fagurgerði og eiga þar sannkallaðan ævintýragarð þar sem fuglar eru aufúsugestir en Örn er ötull ljósmyndari og í verkum hans eru náttúran og fuglarnir oftar en ekki í fyrirrúmi.
