Rarik hefur gerst bakhjarl nýsköpunar- og atvinnulífshátíðarinnar Uppsprettu Suðurlands. Samstarfið byggir á sameiginlegri sýn aðilanna um eflingu byggðar, nýsköpun og framþróun í sunnlensku atvinnulífi.
Uppspretta Suðurlands, sem haldin verður í Ölfusi dagana 6.–7. nóvember næstkomandi, verður stærsti tengslavettvangur landshlutans fyrir frumkvöðla, fyrirtæki og fjárfesta. Aðkoma Rarik að hátíðinni fellur einstaklega vel að kjarnastarfsemi og framtíðarsýn fyrirtækisins, en í stefnu Rarik er rík áhersla lögð á samfélagsábyrgð og að efla hag byggða á dreifiveitusvæðum sínum.
Samfélagsábyrgð og nýsköpun í forgrunni
Við undirritun samkomulagsins kom fram að hraðar tækniframfarir og orkuskipti kalli á nýjar lausnir í atvinnulífinu. Með stuðningi við Uppsprettu vill Rarik leggja sitt af mörkum til að hvetja til nýsköpunar og verðmætasköpunar á Suðurlandi sem skilar sér í aukinni samkeppnishæfni svæðisins alls.
Daníel Leó Ólason, deildarstjóri nýlagna hjá Rarik á Suðurlandi, fagnar samstarfinu og segir það falla beint að markmiðum fyrirtækisins. „Hjá Rarik setjum við umhverfi, samfélagsábyrgð og eflingu byggðar í forgang. Suðurland er í gríðarlegum vexti og Uppspretta Suðurlands er einmitt sá vettvangur sem þarf til að tengja fólk saman og kynnast nýrri tækni og nýsköpun. Það er okkur sönn ánægja að taka þátt í þessari vegferð með Sunnlendingum.“
Trú á sunnlensku hugviti
Markmið Uppsprettu Suðurlands hefur frá upphafi verið að vekja athygli á þeim krafti og fjölbreytileika sem einkennir atvinnusvæðið á Suðurlandi.
Lína Björg Tryggvadóttir, verkefnastjóri hjá SASS, segir samstarfið við Rarik skipta sköpum fyrir framkvæmd hátíðarinnar. „Það er gríðarlega mikilvægt fyrir okkur að fá jafn sterkan samstarfsaðila og Rarik til liðs við okkur. Þetta sýnir í verki mikla trú á sunnlensku atvinnulífi. Við vitum að tækifærin verða til þegar fólk hittist og skiptist á hugmyndum. Með öflugum bakhjörlum getum við gert Uppsprettu að þeim suðupotti hugmynda sem Suðurland á skilið.“
Uppspretta Suðurlands er samstarfsverkefni SASS, Háskólafélags Suðurlands og Markaðsstofu Suðurlands.
p