Lögreglan á Suðurlandi vinnur enn að rannsókn á innflutningi og flutningi á tæplega sex kílógrömmum af hassi sem fundust í fórum íslensks karlmanns á ferð um Mýrdalssand þann 7. nóvember síðastliðinn.
Maðurinn var einn á ferð, á vesturleið, og kannaðist við að vera að flytja efnin. Hann vildi að öðru leiti ekki svara spurningum um tilvist þeirra.
Maðurinn var úrskurðaður í gæsluvarðhald í þágu rannsóknar málsins 19. nóvember en sleppt úr haldi lögreglu þann 14. nóvember þar sem rannsóknarhagsmunir voru ekki taldir standa gegn því að hann gengi laus.
Rannsókn lögreglu lítur að því að upplýsa um uppruna efnanna og mögulegar flutningsleiðir á þeim til landsins. Í tilkynningu frá lögreglunni segir að ljóst sé að sú vinna muni taka tíma.
Í tengslum við rannsóknina var danskur karlmaður handtekinn og yfirheyrður af dönsku lögreglunni en sleppt að yfirheyrslu lokinni. Þá hefur verið haft samstarf við bæði lögreglu í Færeyjum og færeysku tollgæsluna til að upplýsa um ferðir með Norrænu sem tengst gætu flutningi efnanna.