Stofnganga Ferðafélags Rangæinga fór fram þann 1. maí s.l. í blíðviðri en gengið var á hið þekkta fjall og kennileiti Rangæinga Stóru-Dímon. Félagsmenn fjölmenntu til göngunnar en talið er að rúmlega 200 manns hafi tekið þátt og þykir líklegt að aldrei áður hafi svo margir staðið samtímis á toppi Stóru-Dímon.
Stutt athöfn var við rætur fjallsins áður en til göngunnar kom en þar var m.a. greint frá tilurð Ferðafélags Rangæinga sem nú hefur verið stofnað og er þegar orðin allnokkur fjöldahreyfing og sérstök deild í Ferðafélagi Íslands. Afhjúpað var einkennismerki félagsins sem hannað er af Steinunni Ósk Kolbeinsdóttur en í merkinu má m.a. greina fjallið Þríhyrning sem víða sést úr Rangárþingi.
Kvennakórinn Ljósbrá flutti nokkur lög við góðar undirtektir og fluttar voru góðar kveðjur frá velunnurum félagsins m.a. færði Páll Guðmundsson framkvæmdastjóri FÍ hinu nýja félagi góðar gjafir í formi margvíslegs öryggisútbúnaðar. Kynnt var ferðaáætlun félagsins 2022 en hún samanstendur af bæði styttri göngum í byggð og lengri ferðum en allt er það auglýst á Fésbókarsíðunni @Rangaeingar.
Á tindi Stóru-Dímon var útsýni stórfenglegt til allra átta og þar flutti með tilþrifum Gustav Stolzenwald félagi í FFRang kvæðið Gunnarshólma blaðlaust og í fullri lengd – en þar blasir við allt sögusvið kvæðisins. Vakti þetta mikla hrifningu göngufólksins og líður seint úr minni. Var þá gengið niður og þáði göngufólk rausnarlegar veitingar sem voru m.a. í boði Sóma, Ölgerðarinnar, Innes og Almars Bakara. Var mikil ánægja með stofngönguna sem slær tóninn fyrir sumarið hjá ferðaglöðum Rangæingum.