Ragnheiður ráðin forstöðumaður

Ragnheiður Hergeirsdóttir hefur verið ráðin forstöðumaður skóla- og velferðarþjónustu Árnesþings.

Ragnheiður starfar sem félagsráðgjafi á geðsviði Landspítala háskólasjúkrahúss auk þess sem hún hefur verið aðstoðarmaður prófessors í félagsráðgjafadeild Háskóla Íslands og hefur jafnframt sinnt stundakennslu.

Hún hefur víðtæka stjórnunarreynslu, var forstöðumaður Vinnumálastofnunar á Suðurlandi og  verkefnastjóri hjá Vinnumálastofnun. Ragnheiður var um tíma félagsmálastjóri í félagsþjónustu Rangárvalla- og V-Skaftafellssýslu og var bæjarstjóri í Árborg í eitt kjörtímabil auk þess sem hún hefur gegnt ýmsum trúnaðarstörfum fyrir Árborg og önnur sveitarfélög á Suðurlandi, Samband íslenskra sveitarfélaga og ráðuneyti. Hún starfaði áður sem yfirfélagsráðgjafi á Sogni og sem framkvæmdastjóri á svæðisskrifstofu málefna fatlaðra á Suðurlandi.

Ragnheiður mun taka við starfinu af Maríu Kristjánsdóttur sem sinnt hefur forstöðumannsstarfinu frá upphafi starfseminnar.  Hún mun nú hverfa til starfa hjá Sambandi íslenskra sveitarfélaga.