Slökkviliðsmenn frá Brunavörnum Árnessýslu á Flúðum og Selfossi eru á leið upp að fjallaskálanum Setrinu, sunnan undir Hofsjökli, þar sem eldur kviknaði í rafstöðvarhúsi við skálann í dag.
Útkallið barst um klukkan 17:30 frá ferðafólki sem kom að Setrinu á þessum tíma en þá var rafstöðvarhúsið alelda. Setrið sjálft var mannlaust þegar eldurinn kom upp.
„Það er um langa leið að fara og þetta hús er allt brunnið en slökkviliðsmenn fara á staðinn til að ganga úr skugga um að allt sé í góðu lagi að öðru leiti,“ sagði Lárus Kristinn Guðmundsson, settur slökkviliðsstjóri, í samtali við sunnlenska.is.
„Það var til skoðunar fyrst að senda þyrlu á staðinn með slökkviliðsmenn en við hættum við það. Slökkviliðsmenn á Flúðum voru kallaðir út, þar er fjallarúta með dælur og slöngur og einnig sendum við mannskap á buggybíl frá Selfossi en sá bíll er með dælu og lítinn tank og getur sótt vatn í ár og læki. Síðan fáum við aðstoð frá Björgunarfélaginu Eyvindi á Flúðum, Hjálparsveitinni Tintron í Grímsnesi og Björgunarsveitinni Björg á Eyrarbakka, auk þess sem svæðisstjórn björgunarsveitanna er til taks. Það er flott samstarf á milli okkar og allra þessara viðbragðsaðila,“ segir Lárus.
Sex slökkviliðsmenn og nokkrir björgunarsveitarmenn eru á leið á vettvang en leiðin er löng og hálendisvegirnir grófir. „Fyrsti bíll er að lenda á vettvangi rétt í þessu,“ sagði Lárus að lokum, nú um klukkan 20:40.