Slökkviliðsmenn frá Brunavörnum Árnessýslu í Árnesi voru kallaðir að vinnubúðum við Búrfellsvirkjun á sjöunda tímanum í gærkvöldi þar sem eldur hafði kviknað í pallbíl.
Eldurinn kviknaði í rafhlöðu bílsins og þegar slíkt gerist er erfitt fyrir slökkviliðsmenn að athafna sig. Bíllinn brann því til kaldra kola.
„Þegar kemur eldur í rafhlöðuna sjálfa þá er mjög erfitt að slökkva í henni. Það verður mikill eldur af, kemur hættulegt gas fyrst og þegar kviknar síðan í bílnum sjálfum þá brennur þetta mjög hratt og getur brunnið lengi,“ sagði Lárus Kristinn Guðmundsson, varaslökkviliðsstjóri, í samtali við sunnlenska.is.
Slökkviliðsmenn frá Árnesi voru fljótir á vettvang og vörnuðu því að eldur bærist í vinnubúðirnar. Auk tækjabíls frá Árnesi var tankbíll frá Flúðum sendur á vettvang.
Lögreglan á Suðurlandi rannsakar upptök eldsins.
