Bæjarstjórn Árborgar hefur samþykkt að hefja endurbætur á ráðhúströppunum á Selfossi á þessu ári. Uppfærð hönnun og útlit á tröppum fyrir framan ráðhúsið var kynnt á fundi eigna- og veitunefndar í lok janúar.
Aðgengi hreyfihamlaðra mun batna við þessa framkvæmd en rampurinn er hannaður samkvæmt leiðbeiningum Öryrkjabandalags Íslands um aðgengi fyrir alla.
Með þessari útfærslu er tryggt gott og öruggt flæði gangandi vegfarenda í allar áttir, óháð því hvaðan þeir koma eða hvert þeir stefna. Hæðarsetningar þrepa hafa verið einfaldaðar og verða endanlegar mælingar teknar við lokahönnun. Verkið er hannað af Landformi á Selfossi.
Hluta af tröppunum hefur nú verið lokaður af til að tryggja öryggi vegfarenda en gert er ráð fyrir að framkvæmdin fari í útboð á næstu vikum og framkvæmdir geti hafist síðar í vor.
