Ráðherrar grilla ofan í gesti Kótelettunnar

Guðni Th Jóhannesson, forseti Íslands, grillaði ofan í gesti Kótelettunnar ásamt Gísla Halldóri Halldórssyni, bæjarstjóra, síðast þegar hátíðin var haldin. Í ár verða ráðherrar í þessu hlutverki. Ljósmynd/Aðsend

Fjölskyldu og tónlistarhátíðin Kótelettan verður haldin á Selfossi nú um helgina. Kótelettan er nú haldin í ellefta skipti og er löngu orðin árviss viðburður.

„Það er mikil eftirvænting í loftinu og það stefnir í frábæra hátíð. Við urðum við að fresta Kótelettunni í fyrra vegna COVID og því má segja að það sé tvöföld spenna fyrir hátíðinni nú. Tónlistarhátíð Kótelettunar verður að venju haldin við Hvítahúsið á Selfossi með bæði úti- og innisvið. Hátíðin verður einstaklega glæsileg í ár þar sem frábær hópur tónlistamanna stígur á stokk og ætti því enginn að láta þessa veislu framhjá sér fara. Styrktarfélag krabbameinssjúkra barna í samstarfi við Mömmumat, SS og Kjarnafæði verður með sína árlegu sölu á kótelettum á laugardag milli kl. 13-16 á grillhátíðinni í Sigtúnsgarði og þar geta landsmenn nælt sér í ljúffengar kótelettur og styrkt gott málefni í leiðinni,” segir Einar Björnsson, framkvæmdastjóri hátíðarinnar.

Sigurður Ingi Jóhannsson samgönguráðherra og Bjarni Benediktsson fjármálaráðherra verða sérstakir aðstoðargrillarar ásamt Þorgerði Katrínu Gunnarsdóttur og Oddnýju Harðardóttur, Guðna Ágústssyni og BBQ kónginum.

Hátíðin hefur aldrei verið glæsilegri að sögn Einars en hátt í tuttugu tónlistarmenn- og konur munu koma fram á tveimur sviðum við Hvíta húsið á Selfossi. Páll Óskar, Bríet og Herra Hnetusmjör munu troða upp á tónlistarhátíð Kótelettunnar og auk þeirra þriggja munu Stuðlabandið, Sprite Zero Klan, Love Guru, GDRN ásamt hljómsveit, Jói Pé & Króli, DJ Rikki G auk fjölda annara stíga á stokk á hátíðinni. Þá verða markaðir starfræktir eins og áður á hátíðinni og mikil og góð barnadagskrá þar sem Sveppi, Benedikt Búálfur, íþróttaálfurinn og Solla stirða stíga á stokk. Gestir á hátíðinni geta kynnt sér flottustu grillin og allt það besta á grillið frá íslenskum framleiðendum í sumar á Stóru grillsýningunni sem verður á sínum stað.

Fyrri greinNýtt hesthúsahverfi á Rangárbökkum
Næsta greinTvö rauð í Suðurlandsslagnum – Árborg með stórsigur