Áslaug Arna Sigurbjörnsdóttir, háskóla-, iðnaðar- og nýsköpunarráðherra, hefur að undanförnu staðsett skrifstofu sína á landsbyggðinni, í Snæfellsbæ og Mosfellsbæ. Það hefur lukkast vel og nú er röðin komin að Árborg.
Ráðherra mun verða með skrifstofu í Bankanum vinnustofu á Selfossi mánudaginn 5. september. Þar mun Áslaug Arna taka á móti gestum á opnum viðtalstíma kl. 10:30-11:30 og öll áhugasöm geta komið í stutt, milliliðalaust spjall um málefni á borði háskóla-, iðnaðar- og nýsköpunarráðuneytisins.
„Hugmyndin kviknaði þegar ég var að hugsa hvernig ráðuneyti sem væri búið til árið 2022 myndi starfa. Með þessu kynnist ég enn betur starfsemi sem tengist ráðuneytinu um allt land og fæ tækifæri til að prófa að starfa annars staðar en í Reykjavík,“ segir Áslaug ARna.
Frá því að nýtt háskóla-, iðnaðar- og nýsköpunarráðuneyti tók til starfa í febrúar hefur ráðuneytið verið opið fyrir störfum óháð staðsetningu. Í því felst að starfsemi ráðuneytisins er ekki bundin við einn ákveðin stað þrátt fyrir að aðalstarfsstöð þess sé staðsett í Reykjavík. Þannig geta starfsmenn ráðuneytisins unnið að heiman eða frá þeim stað á landinu sem best hentar hverju sinni.