Ráðstefnan Ungt fólk og lýðræði

Ráðstefnan „Ungt fólk og lýðræði“ verður haldin dagana 29. – 31. mars á Hótel Hvolsvelli. Þema ráðstefnunnar að þessu sinni verður ungt fólk og fjölmiðlar.

Ungmennafélag Íslands hefur ávallt lagt áherslu á lýðræðislega þátttöku ungs fólks og vandað hefur verið til dagskrár ráðstefnunnar. Þetta er í þriðja sinn sem þessi ráðstefna er haldinn en áður hefur hún verið á Akureyri og Laugum í Dalasýslu.

Undirbúningur fyrir ráðstefnuna Ungt fólk og lýðræði er í fullum gangi og mikill áhugi er hjá ungmennaráðum víða um land. Í vikunni var fundur á Hótel Hvolsvelli þar sem fulltrúar UMFÍ, Sæmundur Runólfsson, framkvæmdastjóri, Guðrún Snorradóttir, verkefnastjóri, Gunnar Gunnarsson, sem sæti á í undirbúningsnefnd ráðstefnunnar, funduðu með Óla Jón Ólason hótelstjóra sem mun láta fara vel um ráðstefnugesti.

Síðan var haldinn fundur með Ísólfi Gylfa Pálmasyni sveitarstjóra í Rangárþingi Eystra og Lilju Einarsdóttur frá Rangárþingi eystra þar sem þau stilltu saman strengi sína til að ráðstefnan verði hin glæsilegasta. Sveitarstjórinn mun taka á móti ráðstefnugestum við upphaf hennar.

Einnig áttu forsvarmenn UMFÍ fund með framkvæmdastjóra HSK, Engilbert Olgeirssyni, og gert er ráð fyrir góðri þátttöku frá héraðssambandinu.

Forseti Íslands, herra Ólafur Ragnar Grímsson, mun ávarpa þátttakendur við setningu ráðstefnunnar. Þátttakendur byrja að fá kynningu um fjölmiðla þar sem Helgi Seljan, fjölmiðlamaður heldur erindi. Þá verður erindi um mannréttindi og hópefli og þátttakendur velja sér síðan vinnustofur í framhaldi af því. Kvöldvökur verða bæði kvöldin og ættu allir að hafa bæði gagn og gaman af.

Ráðstefnan er ætluð ungu fólki á aldrinum 16-25 ára. Fjöldi þátttakenda verður takmarkaður við 70 manns. Þátttökugjald eru 10.000.- fyrir hvern einstakling og eru allar ferðir, upphald og ráðstefnugögn innifalin.

Nánari upplýsingar er að fá hjá Ungmennafélagi Íslands í síma 568-2929 eða senda fyrirspurn á gudrun@umfi.is.