Fyrirtækin Pure North í Hveragerði og BM Vallá hlutu í dag Kuðunginn, umhverfisviðurkenningu umhverfis-, orku- og loftslagsráðuneytisins, fyrir framúrskarandi starf að umhverfismálum á síðasta ári. Við sama tækifæri voru nemendur í Dalskóla útnefndir Varðliðar umhverfisins.
Pure North hlaut Kuðunginn í flokki smærri fyrirtækja og í rökstuðningi dómnefndar segir að Pure North hafi með einstökum hætti markað sér sess sem leiðandi umhverfistæknifyrirtæki á Íslandi. Allt frá stofnun hafi fyrirtækið lagt áherslu á sjálfbærni, nýsköpun og ábyrgð í úrgangsmálum.
Pure North hafi með nýtingu jarðhita við plastendurvinnslu náð að draga úr kolefnisspori vinnslunnar um 82% miðað við sambærilega framleiðslu í Evrópu, sem gerir endurunnið plast þeirra með því umhverfisvænasta sem finnst á markaði. Þá hafi Pure North náð að loka endurvinnsluhringrásinni með því að hefja framleiðslu á vörum úr plastinu sem fyrirtækið fái inn til endurvinnslu.
Metnaðarfulla vinna Pure North við þróun úrgangslausna sé ekki síður lofsverð, líkt og hugbúnaðurinn „Úlli úrgangsþjarkur”, sem nýtir gervigreind til greina úrgangsgögn fyrirtækja og sveitarfélaga, og móttöku- og flokkunarstöðin „Auðlind” séu til vitnis um. Segir í úrskurði dómnefndar að með samþættingu Auðlindar við hugbúnaðinn Úlla hafi „Pure North skapað fyrirmyndar umgjörð fyrir skilvirka úrgangsstjórnun og hringrásarhugsun á Íslandi.“
Jóhann Páll Jóhannsson, umhverfis-, orku- og loftslagsráðherra, segir að fyrirtækin sem hljóti Kuðunginn að þessu sinni tengist með beinum hætti stórum áskorunum sem heimurinn standi frammi fyrir í umhverfismálum.
„Það er ánægjulegt að verða vitni að þeirri áherslu sem þau leggja á sjálfbærni, nýsköpun og ábyrgð í úrgangs- og losunarmálum. Þessi fyrirtæki sýna okkur að það er ekki bara siðferðilega rétt að reka ábyrga og metnaðarfulla umhverfisstefnu heldur er það líka skynsamleg viðskiptaákvörðun,“ sagði Jóhann Páll við þetta tilefni.
Í dómnefnd sátu Helga Hvanndal Björnsdóttir, formaður, Reynir Smári Atlason, f.h. Samtaka atvinnulífsins, Sigmundur Halldórsson f.h. Alþýðusambands Íslands og Þuríður Helga Kristjánsdóttir, f.h. félagasamtaka á sviði umhverfisverndar.