Prófkjör hjá framsóknarfólki í Suðurkjördæmi

Sigurður Ingi Jóhannsson og Silja Dögg Gunnarsdóttir eru núverandi alþingismenn Framsóknarflokksins í Suðurkjördæmi. Ljósmynd/Framsókn

Á kjördæmisþingi Kjördæmissambands Framsóknarfélaganna í Suðurkjördæmi síðastliðinn fimmtudag var samþykkt tillaga um að lokað prófkjör verði haldið til að velja á lista Framsóknarflokksins í Suðurkjördæmi fyrir næstu alþingiskosningar.

Stjórn KSFS lagði fram tillöguna um prófkjörið og var hún samþykkt með 78% atkvæða. Kosið verður um sex efstu sæti listans í Suðurkjördæmi samkvæmt reglum flokksins þar um. Kjördagur verður laugardagurinn 10. apríl 2021 og rétt til atkvæðagreiðslu eiga flokksbundnir framsóknarmenn sem eiga lögheimili í kjördæminu 30 dögum fyrir prófkjörsdag.

Kjördæmisþingið var haldið í fjarfundi en skráðir fulltrúar voru rúmlega eitthundrað. Þingið fór vel fram við óvenjulegar aðstæður en þetta er í fyrsta sinn sem þing KSFS er haldið í fjarfundi auk þess sem kosningar voru rafrænar.

Á þinginu var jafnframt samþykkt tillaga frá Jóni Gautasyni, formanni Guðna, félags ungra Framsóknarmanna í Árnes- og Rangárvallasýslu, að leitað yrði leiða til að hægt verði að kjósa með rafrænum hætti í prófkjörinu.

Björn Harðarson var endurkjörinn fomaður KSFS á þinginu en auku hans skipa stjórn þau Magnea Herborg Björnsdóttir, Gunnlaugur Hreinsson, Gissur Jónsson, Jóhanna Ýr Jóhannsdóttir, Kristján Sigurður Guðnason og Guðrún Sigríður Briem.

Í kjörstjórn KSFS fyrir prófkjörið voru kjörin Magnea Herborg Björnsdóttir formaður, Karl Pálmason, Reynir Arnarson, Sigrún Þórarinsdóttir, Friðrik Björnsson, Gissur Jónsson og Hafdís Hrönn Hafsteinsdóttir.