Plokkvinafélag hefur verið stofnað á Selfossi og blæs það til sérstaks stofnplokks á laugardagsmorgun, þann 25. apríl, við Austurgarð á Selfossi.
Plokkið hefst klukkan 11:00 og stendur til 13:00 og er eins konar forskot á sæluna fyrir Stóra plokkdaginn, sem er um land allt á sunnudaginn. Það er engin önnur en Elín Birna Bjarnfinnsdóttir, yfirplokkari, sem er formaður félagsins og verndari þess er Einar Bárðarson einn af forfeðrum plokksins á Íslandi.
Það er nóg að mæta bara
„Þetta verður heljarinnar gaman. Húsasmiðjan er búin að leggja okkur til tangir og poka þannig að það er nóg að fólk mæti bara tilbúið í slaginn. HP kökugerð ætlar að senda okkur kleinur með kaffinu, en Tommi á Kaffi Krús ætlar að hella uppá, þannig að það fara allir sælir og glaðir frá þessu létta verki með okkur á laugardag,“ segir Elín Birna.
Veðurspáin fyrir helgina lítur vel út og það er ekkert aldurstakmark og allir velkomnir. Mæting er við Austurgerð kl. 11 og þar verða fulltrúar Plokkvinafélagsins að afhenda tæki, tól og kenna tökin á plokkinu.