Á morgun, þriðjudag, býður Plokkvinavélag Zo•On öllum þeim sem hafa áhuga að koma með og plokka á milli klukkan 17 og 18 á Selfossi.
Hópurinn mun hittast í versluninni Emil&Lína og Zo•On við Larsenstræti 2 á Selfossi upp úr 16:30 og mun ganga þaðan í fylgd formanns félagsins, Elínar Birnu Bjarnfinnsdóttur en Elín er þaulvanur plokkari og leiðir hópinn að góðu plokksvæði.
„Það er mikilvægt að plokka til þess að halda umhverfinu snyrtilegu og ef allir ganga vel um þá verður allt betra – en þá þurfa allir að taka þátt! Þetta er líka bara svo gaman, að skella sér í gönguferð og plokka í leiðinni, þetta er góð útivist líka,“ segir Elín Birna.
Engin skráning er nauðsynleg og allir eru velkomnir. Foreldra eru sérstaklega hvattir til að mæta með börnin með sér og nýta tækifærið í samveru utandyra og til að kenna börnunum mikilvægi þess að hugsa vel um umhverfið sitt.
„Það er alveg nauðsynlegt að hafa börnin með og kenna þeim að ganga vel um umhverfið og henda ekki drasli. Ég veit um börn sem taka rusl með sér ef þau sjá það, sem er frábært,“ segir Elín Birna.
Ruslatínur og pokar verða á staðnum fyrir alla þátttakendur og Zo•On býður upp á kaffi, safa og kleinur áður en haldið er af stað.
Elín Birna er mjög spennt fyrir morgundeginum. „Spáin er góð og ég vona að fólk mæti.’’
Plokkvinafélag Zo•On á Selfossi var stofnað í vor og hefur plokkað reglulega í allt sumar enda er þörfin mikil í stækkandi bæjarfélagi. Félagsskapurinn heldur úti Facebook-hóp og er fólk hvatt til að gerast meðlimir til fylgjast með framtíðar viðburðum.
