Piia Tomingas og Þorbjörg Anna Gísladóttir hlutu hvor um sig 1 milljón króna styrk þegar úthlutað var úr Vísinda- og rannsóknarsjóði Suðurlands á dögunum. Styrkirnir eru veittir til námsverkefna á háskólastigi og tengjast Suðurlandi með ótvíræðum hætti.
Markmið Vísinda- og rannsóknarsjóðsins er að styrkja stúdenta sem eru að vinna að lokaprófsverkefni til rannsóknarstarfa á Suðurlandi. Til að koma til álita sem verðlaunaverkefni þá þarf það að tengjast sunnlensku atvinnulífi eða menningu eða náttúru sterkum böndum.
Verkefni Piiu snýst um að skilja hvernig endurheimt votlendis og rykákomur (fok úr jarðvegi) hafa áhrif á lífríki í votlendi á Suðurlandi. Verkefnið hefur mikla þýðingu við aðgerðir til að endurheimta votlendi sem vísindamenn eru sammála um að sé þýðingarmesta aðgerðin við að draga úr losun koltvísýrings í landbúnaði og þar með draga úr kaupum á losunarheimildum sem stjórnvöld standa frammi fyrir á næstu árum.
Þorbjörg hlaut styrk fyrir rannsóknir á gossögu og uppruna bergs Heklu og Vatnafjalla. Þorbjörg rýnir langt aftur í tímann, eða meira en 11.000 ár, til að kortleggja gossögu svæðisins. Með því að efnagreina gamalt berg er hægt að lesa í hegðun Heklu. Þessi þekking er mikilvæg fyrir öryggi íbúa og ferðafólks á Suðurlandi, því fortíðin gefur okkur vísbendingar um hvað framtíðin ber í skauti sér.
Í ár bárust 16 umsóknir í sjóðinn og ákvað stjórn sjóðsins að skipta 2 milljóna króna styrknum jafnt á milli þessara tveggja verkefna. Í stjórn sjóðsins sitja Sveinn Aðalsteinsson, framkvæmdastjóri Orkídeu, Sigurður Sigursveinsson, fyrrum framkvæmdastjóri Háskólafélags Suðurlands og Lilja Jóhannesdóttir, fyrrum forstöðumaður Náttúrustofu Suðausturlands.