Erlendir ferðamenn við Gullfoss tilkynntu lögreglunni um þjófnað á fjármunum síðastliðinn sunnudag.
Svo virðist sem farið hafi verið inn í bíl þeirra á bílastæði þar og peningarnir teknir.
Aðrir ferðamenn sem voru þar á ferð síðastliðinn fimmtudag urðu þess varir að morgni næsta dags að frá þeim höfðu verið teknir peningar og er mögulegt að það hafi gerst á svipuðum slóðum án þess að þau hafi orðið þess vör.
Lögreglan segir að tilkynningar sem þessar berist alltaf af og til og sé full ástæða til þess að hvetja fólk til að gæta að verðmætum í ferðum sínum.