Veðrið hafði mikil áhrif á umferðina í síðustu viku. Stundum getur það verið til bóta því einungis fjórir ökumenn voru kærðir fyrir að aka of hratt á Suðurlandi en afar sjaldgæft er að lögreglan hafi ekki afskipti af fleirum vegna hraðaksturs.
Hinsvegar ber að hafa það í huga að þó ekki sé ekið of hratt miðað við hámarkshraða á vegi þá getur verið að aðstæður leyfi ekki einu sinni þann hraða. Lögreglan segir í dagbók sinni að þessi staðreynd virðist flækjast fyrir þeim sem ekki hugnast lokun vega vegna ófærðar.
„Undanfarnar vikur höfum við fengið árekstra þar sem ekið er á ökutæki sem eru föst í sköflum og í einu tilviki urðu mjög alvarleg slys á gangandi vegfaranda sem hugðist aðstoða ökumann sem hafði fest bifreið sína þegar sá hafði fest hana í skafli. Engu breytir hversu stórar eða vel búnar bifreiðar eru, ökumaðurinn þarf að sjá það sem er framundan á vegi, líka björgunaraðila eða vegfarendur sem eru að vinna í kring um ökutæki sem þeir hafa fest eða bilað á vegi,“ segir í dagbókinni.
Í liðinni viku voru 22 umferðaróhöpp tilkynnt til lögreglunnar á Suðurlandi. Í tveimur þeirra urðu minniháttar slys á fólki.