Óttast íþyngjandi hömlur á ferðafrelsi í hálendisþjóðgarði

Hestar á Dómadalsleið. Ljósmynd © Mats Wibe Lund

Landssamband hestamannafélaga hefur skilað umsögn um frumvarp um hálendisþjóðgarð til umhverfis- og samgöngunefndar Alþingis.

LH leggst gegn samþykkt fumvarpsins að svo stöddu. Í umsögninni segir meðal annars að sambandinu sé umhugað um friðun og vernd náttúru og menningarverðmæta á miðhálendi Íslands. Sambandið hafi þó verulegar áhyggjur af því að stofnun hálendisþjóðgarðs hafi í för með sér íþyngjandi hömlur á ferðafrelsi og aðgengi hestamanna um hálendið og fornar þjóðleiðir sem ber að varðveita og þannig verði gengið á hefðarrétt hestamanna til að ferðast um hálendið. Enn sé mörgum spurningum ósvarað um reglugerðir sem á eftir að semja, til dæmis um umferð og dvöl á hálendinu.

„Landssamband hestamannafélaga gerir kröfu um að samráð verði haft við hestamenn um aðgang ríðandi umferðar um hálendisþjóðgarðinn og tryggja verði aðkomu almennra hestamanna að ákvörðunartöku, stefnumörkun og uppbyggingu hálendisþjóðgarðs,“ segir í umsögn LH sem leggst gegn samþykkt þessa frumvarps að svo stöddu og telur of mörgum spurningum ósvarað.

Umsögnina í heild má lesa hér