Ösp Viðarsdóttir hefur verið ráðin markaðs- og kynningarfulltrúi Rangárþings ytra, en ráðningin var samþykkt samhljóða á sveitarstjórnarfundi í gær. Ösp mun hefja störf á nýju ári.
Ösp er með BA gráðu í sagnfræði frá Háskóla Íslands auk þess að hafa lokið DipNT gráðu í næringarvísindum og ráðgjöf frá Irish Institution of Nutrition and Health og sótt námskeið bæði í markaðssetningu á netinu og í skapandi skrifum. Hún hefur starfað sem þýðandi hjá Skopos síðastliðin fjögur ár þar sem hún sér m.a. um þýðingar markaðsefnis fyrir ýmis fyrirtæki.
Áður starfaði Ösp hjá Heilsu ehf. í rúm tvö ár sem markaðsfulltrúi og verkefnastjóri heilsuvöru og hafði þar umsjón með vefsvæði, samfélagsmiðlum og greinaskrifum fyrirtækisins ásamt því að sjá um markaðs- og fræðsluefni, taka þátt í vöruþróun og vörukynningum, skipuleggja viðburði og halda námskeið. Þar áður starfaði hún hjá Mamma veit best ehf. í þrjú ár þar sem hún sinnti ýmsum verkefnum, m.a. umsjón og skrifum fyrir vef og samfélagsmiðla, almennum skrifstofustörf og afgreiðslu og ráðgjöf í verslun. Ösp ólst upp í Rangárþingi ytra, er búsett þar og þekkir samfélagið vel.
Ösp tekur við starfinu af Eiríki Vilhelm Sigurðarsyni og í tilkynningu frá Rangárþingi ytra er Ösp boðin velkomin til starfa og Eiríki þakkað fyrir vel unnin störf og óskað velfarnaðar á nýjum vettvangi.