Bæjarráð Árborgar virðir niðurstöðu sveitarstjórnar Flóahrepps sem hafnaði á dögunum erindi Árborgar um færslu á sveitarfélagamörkum til austurs við Selfoss.
Svar Flóahrepps var rætt á síðasta bæjarráðsfundi í Árborg og þar kom fram að ósk Árborgar um opið samtal milli sveitarfélaganna um hugsanlega sameiningu standi áfram.
Í bókun bæjarráðs Árborgar er bent á að á undanförnum árum hafi verið stigin stór skref á landsvísu við sameiningar sveitarfélaga, íbúum til heilla. Árborg og Flóahreppur séu nú þegar í samvinnu um ýmsa þjónustu við íbúa samkvæmt samningum. Í opnu samtali þyrfti eðlilega að ræða alla þjónustuþætti með hag íbúa að leiðarljósi.
Færsla sveitarfélagamarkanna til austurs snýst um landsvæði í Flóahreppi sem er í eigu Árborgar. Sveitarstjórn Flóahrepps vill ekki sleppa tökum á þessu svæði og segir að veruleg verðmæti felist í landinu, einkum með tilliti til tekjuöflunar í formi fasteignagjalda af skilgreindu verslunar og þjónustusvæði.
Þrátt fyrir að hafa hafnað erindi Árborgar hyggst sveitarstjórn Flóahrepps kanna hug íbúa sinna til sameiningar sveitarfélaga næsta vor.