Ósar Markarfljóts færðir austar

Í dag kynntu fulltrúar Siglingastofnunar samgönguráðherra tillögur um aðgerðir við viðhaldsdýpkun í Landeyjahöfn. M.a. verða ósar Markarfljóts færðir austur um 2 km.

Ráðherra tók tillögunum vel og féllst á þær. Í stuttu máli felast þær í þremur liðum:

1. Í framhaldi af útboði á viðhaldsdýpkun verði stefnt að samningi við Íslenska gámafélagið, en fyrirtækið átti hagstæðasta tilboðið m.t.t. verðs og dýpkunartækja.

2. Í samvinnu við Eyjamenn verði keyptur plógur sem Lóðsinn í Vestmannaeyjum noti til að draga efni úr innsiglingu Landeyjahafnar. Slíkan búnað væri unnt að nota í yfir 2ja metra ölduhæð og gæti hann opnað höfnina og haldið opinni eftir minni veður.

3. Gerður verði flóðvarnargarður til að færa ósa Markarfljóts austur um 2 km. Þeirri aðgerð er ætlað að draga úr því að sandburður úr fljótinu berist inn í höfnina.

Áætlaður heildarkostnaður við þessa aðgerðir er um 180 milljónir króna í vetur, en það er sama upphæð og gert er ráð fyrir í frumvarpi til fjáraukalaga fyrir árið 2010.