Sveitarstjórn Rangárþings eystra lýsir yfir vonbrigðum yfir að samkvæmt fjárlögum ársins 2017 séu lögð niður fjárframlög til eflingar löggæslu í umdæmi lögreglunnar á Suðurlandi, með tilliti til öryggis íbúa og ferðamanna.
Þetta kemur fram í ályktun vegna eflingar löggæslu sem sveitarstjórnin samþykkti samhljóða á síðasta fundi sínum.
„Um er að ræða lækkun sem nemur ríflega 10% heildar fjárheimilda lögreglunnar á Suðurlandi eða um 102 milljónir króna. Umdæmi lögreglunnar á Suðurlandi er mjög stórt og víðfemt. Þar eru vinsælustu ferðamannastaðir landsins í byggð og óbyggð. Til grundvallar þessara fjárheimilda frá fyrra ári lá vönduð undirbúningsvinna með tilliti til fjölgunar ferðamanna og verulega aukinnar umferðar. Þegar litið er til aukinnar umferðar og fjölgunar slysa er þessi niðurstaða með öllu óásættanleg enda skerðist verulega hvorutveggja, öryggi íbúa umdæmisins og annarra vegfarenda,“ segir í ályktun sveitarstjórnar Rangárþings eystra.