Orkídeu ýtt úr vör

Eva Björk Harðardóttir, formaður Samtaka sunnlenskra sveitarfélaga, Kristján Þór Júlíusson, sjávarútvegs- og landbúnaðarráðherra, Kristín Linda Árnadóttir, aðstoðarforstjóri Landsvirkjunar og Ragnheiður I. Þórarinsdóttir, rektor Landbúnaðarháskóla Íslands undirrituðu samninginn. Ljósmynd/Hari

Orkídeu, nýju samstarfsverkefni um nýsköpun á Suðurlandi, hefur verið ýtt úr vör með undirskrift fulltrúa allra þeirra sem að verkefninu standa, en það eru Landsvirkjun, Samtök sunnlenskra sveitarfélaga, Landbúnaðarháskóli Íslands og sjávarútvegs- og landbúnaðarráðherra.

„Tilurð samstarfsverkefnisins Orkídeu er rökrétt framhald af mörkun stefnu fyrir Suðurland í Sóknaráætlun Suðurlands 2020 – 2024 og orkustefnu fyrir landshlutann. Í Sóknaráætluninni er m.a. tilgreint að á Suðurlandi sé öflugt atvinnulíf með aukinni nýsköpun, framleiðni og fjölbreyttum atvinnutækifærum. Heimamenn sjá landshlutann fyrir sér á árinu 2024 þannig að: Á Suðurlandi hefur aukin nýsköpun, framleiðni og fjölgun fyrirtækja leitt af sér öflugra atvinnulíf. Mannlíf og lífsgæði á Suðurlandi blómstra með aukinni velferð, lifandi menningu og stóraukinni samvinnu. Kolefnisspor Suðurlands hefur dregist saman með bættri umhverfisvitund og breyttu neyslumynstri,“ segir Eva Björk Harðardóttir, formaður Samtaka sunnlenskra sveitarfélaga.

„Suðurland hefur m.a. yfir að ráða miklum náttúruauðlindum, mannauði og öflugri matvælaframleiðslu. Samstarfsverkefnið gerir okkur kleift að nýta þau sóknarfæri sem eru til staðar með öflugum samstarfsaðilum, Sunnlendingum og Íslendingum öllum til heilla,“ bætir Eva Björk við.

Uppbygging orkutengdra tækifæra
Orkídea snýst um uppbyggingu orkutengdra tækifæra framtíðarinnar á Suðurlandi, til dæmis við matvælaframleiðslu og líftækni, sjálfbæra nýtingu auðlinda, sprotastarfsemi og að undirbúa svæði til að taka á móti orkutengdri nýsköpun. Eitt meginmarkmiða samstarfsins er að auka verðmætasköpun í matvælaframleiðslu í landinu og gera framleiðsluna umhverfisvænni með nýtingu á grænni orku sem býr þannig til tækifæri fyrir íslenska matvælaframleiðendur til að vera samkeppnishæfir á alþjóðamarkaði. Ætlunin er að stuðla að aukinni nýsköpun og rannsóknum á sviði hátæknimatvælaframleiðslu með öflugu samstarfi við háskóla, rannsóknastofnanir og atvinnulíf og fjölga möguleikum svæðisins til að takast á við áskoranir samtímans og gera svæðið leiðandi þegar kemur að samspili orku, umhverfis og samfélags.

Heiti samstarfsverkefnisins, Orkídea, vísar bæði til grænu orkunnar og til þeirrar hugmynda – ídea – sem spretta upp í frjóum farvegi. Auglýst verður eftir framkvæmdastjóra og rannsókna- og þróunarstjóra fljótlega, en starfsstöð Orkídeu verður á Suðurlandi.

Styður beint við stefni Landbúnaðarháskólans
Ragnheiður I. Þórarinsdóttir, rektor Landbúnaðarháskóla Íslands, segir að skólinn fagni stofnun Orkídeu og því formlega samstarfi sem komið hefur verið á fót.

„Íslendingar eiga mikil tækifæri til nýsköpunar og aukinnar matvælaframleiðslu með nýtingu hreinnar orku og annarra náttúruauðlinda með sjálfbærni að leiðarljósi. Orkídea styður beint við stefnu Landbúnaðarháskólans sem samþykkt var á síðasta ári þar sem horft er til þess að efla nýsköpun, rannsóknir og kennslu á öllum skólastigum og mun eiga þátt í því að efla starfsemi skólans á Suðurlandi með því að styrkja og byggja upp innviði og bæta enn frekar nýtingu þeirra,“ segir Ragnheiður.