Fræðsluyfirvöld í Sveitarfélaginu Árborg munu í vikunni opna ábendingavef í tengslum við endurskoðun á skólastefnu sveitarfélagsins.
Þar geta íbúar á öllum aldri skráð inn ábendingar og hugmyndir um skólamál sem þeir vilja koma á framfæri. Á vefnum er opinn flokkur fyrir hugmyndir en einnig nokkrir efnisflokkar sem hægt er að bregðast við með athugasemdum. Þá er hægt að taka afstöðu til hugmynda sem þegar eru komnar á vefinn með því að smella á þumalinn í viðkomandi athugasemd.
Hugmyndir og ábendingar sem komu fram á fundi foreldraráða leikskóla og skólaráða grunnskóla, sem haldinn var á dögunum, verða settar á vefinn. Einnig annað efni sem á eftir að berast, svo sem frá hugarflugsfundi nemendafélaga grunnskólanna.
Aðgengi að vefnum er í gegnum heimasíðu sveitarfélagsins.