Almannavarnir hafa ákveðið að aflétta lokun, sem verið hefur á veginum í Þórsmörk.
Í gær voru sett upp skilti á leiðinni í Þórsmörk í nágrenni Gígjökuls þar sem varað er við hugsanlegri hættu í lónstæði Gígjökuls. Þar geta myndast eitraðar gastegundir og kviksyndi en auk þess getur verið hætta á hruni úr jöklinum og skyndilegu vatnsflóði.
Vegagerðin hefur unnið að lagfæringu á veginum undanfarna daga. Vegfarendur um Þórsmerkurveg eru beðnir um að sýna varúð þegar þeir fara um svæðið.