Opnað inn í Þórsmörk

Á fundi almannavarnanefndar og vísindamanna í gær var ákveðið var að aflétta lokun sem verið hefur á umferð inn í Þórsmörk og verður vegurinn þangað opnaður í hádeginu.

Vegagerðin lagfærði veginn um helgina en hann er engu að síður aðeins fær breyttum jeppum og öflugum rútum.

Öll umferð fólks um Hrunagil og Hvannárgil (þar sem hraun er að renna) er bönnuð vegna hættu á eitruðu gasi sem þar kann að safnast fyrir og vegna hættu á gufusprengingum. Vísindastofnanir hafa bannað sínu fólki að fara inn í gilin vegna þessarar hættu.

Ástand gönguleiða í Þórsmörk er breytilegt og eru þeir sem hyggja á göngu þaðan hvattir til að setja sig í samband við staðarhaldara í skálum sem þar eru áður en lagt er af stað.

Lögregla og björgunarsveitir verða með eftirlit og gæslu í Þórsmörk og við eldstöðina.

Á fundinum var farið yfir stöðuna á eldgosinu og horfur þess. Líkur á því að kvikan brjóti sér leið út annarsstaðar eru taldar litlar en Eyjafjallajökull verður áfram lokaður fyrir umferð.