Kaldvík stendur fyrir opnum degi næstkomandi laugardag í starfstöðum sínum að Laxabraut, Bakka og Fiskalóni í Ölfusi.
„Við erum mjög spennt fyrir því að opna dyrnar fyrir almenningi og gefa fólki tækifæri til að kynna sér starfsemi okkar. Þetta er frábært tækifæri til að sýna hvernig við vinnum, hvað felst í sjálfbæru laxeldi og hvers vegna við erum stolt af því sem við gerum. Við vonum að gestir njóti heimsóknarinnar, læri jafnvel eitthvað og finni hversu mikilvæg gæði, velferð og umhverfisábyrgð eru í okkar daglega starfi,“ segir Ólöf Helga Jónsdóttir, framkvæmdastjóri mannauðsmála hjá Kaldvík, í samtali við sunnlenska.is.
Kaldvík er íslenskt laxeldisfyrirtæki með aðsetur á Eskifirði, en starfsstöðvar um allt land og sérhæfir sig í sjálfbæru eldi á Atlantshafslaxi í hreinum og köldum fjörðum Austurlands. Fyrirtækið var áður þekkt sem Ice Fish Farm, en tók upp nafnið Kaldvík árið 2024 til að endurspegla sameiningu Ice Fish Farm, Laxar fiskeldi, Búlandstinds og annarra rekstrareininga.
Sjálfbærni í forgrunni
Kaldvík rekur alla virðiskeðju laxeldisins, þar með talið seiðaeldisstöðvarnar þrjár í Ölfusi og við Kópasker, sjóeldisstöðvar í fjörðum eins og Fáskrúðsfirði, Reyðarfirði og Berufirði, og sláturhús í Djúpavogi. Fyrirtækið hefur leyfi til að framleiða allt að 43.800 tonn af laxi árlega og hyggur á frekari vöxt á komandi árum.
Sjálfbærni er í forgrunni hjá Kaldvík, þar sem fyrirtækið notar hvorki sýklalyf né lúsameðferðir í sinni framleiðslu. Kaldvík hefur hlotið AquaGAP vottun og starfar skv. Stöðlum Aquaculture Stewardship Counsil (ASC) og Whole Foods Market, sem tryggir hágæða og umhverfisvæna framleiðslu.
Þrjár seiðaeldisstöðvar á Suðurlandi
Á Suðurlandi starfar fjöldi manns í starfsstöðvunum þremur, í fjölbreyttum störfum, allt frá framleiðslu, tækniteymi, framleiðslustjórnun og gæðastjórnun. Starfsemin á þessum starfsstöðvum er öll viðkvæm í uppvexti laxins, og þá kannski sérstaklega á Fiskalóni, og því mikilvægt að gæðamál séu eins og best verður á kosið.
Fiskalón sér um frumstig eldisins, frá litlum seiðum upp að 30 gr. að stærð. Bakki tekur á móti hrognum og elur þau þar til eru orðin að kviðpokaseiðum, þ.e.a.s. þau búin að klekjast út. Bakki sér svo einnig um bólusetningu á seiðunum og að koma laxinum í svokallaðan sjógöngubúning. Á Laxabraut eru tólf ker með sjó og þar er tekið við seiðum þegar þau eru tilbúin í sjógöngubúning. Á hverju sumri er útskipun, þar sem laxinn er fluttur í kvíar á Austurlandi.
Þegar laxinn hefur lokið vexti sínum á þessum stöðvum, er hann fluttur með brunnbát austur á land þar sem hann er færður í sjókvíar og vex enn frekar í allt að tvö ár.