Í dag opnaði Orka náttúrunnar hlöðu með hraðhleðslu fyrir rafbíla við þjónustustöð N1 á Hvolsvelli. Næstu hlöður ON verða á þjónustustöðvum N1 í Vík og á Kirkjubæjarklaustri.
Það var Bergur Þorri Benjamínsson, formaður Sjálfbjargar, sem tók hlöðuna formlega í notkun en ON hefur kappkostað að hlöðurnar séu sem aðgengilegastar fyrir fatlaða rafbílaeigendur. Viðstödd voru stöðvarstjórar N1 á Hvolsvelli, hjónin Ólafía Ingólfsdóttir og Guðmundur Elíasson, og fjöldi starfsmanna ON með Bjarna Má Júlíusson framkvæmdastjóra í fararbroddi.
Bjarni Már segir suðurleiðina óðum vera að opnast fyrir rafbílaeigendum sem fjölgi nú sem aldrei fyrr hér á landi.
„Við hjá ON ætlum að varða hringveginn með hlöðum og nú eru þær orðnar sautján talsins þar sem fljótvirkar hraðhleðslur standa rafbíleigendum til boða. Á næstunni opnum við í Vík og á Klaustri og undirbúningur við Jökulsárlón er langt kominn,“ segir Bjarni Már. Hann bætir við að þó ON leggi til hleðslurnar sjálfar og upplýsingakerfi þeim tengd, þá komi fjöldi aðila að uppsetningu á hverri hlöðu.
„Við hjá ON kunnum samstarfsaðilum okkar – og hér á Hvolsvelli sérstaklega N1 – miklar þakkir. Við höfum skýra sýn á uppbyggingu þessara innviða fyrir umhverfisvænni og hagkvæmari samgöngur og treystum á að fleiri deili henni með okkur svo við getum opnað hringveginn sem fyrst,“ segir Bjarni Már Júlíusson framkvæmdastjóri ON í fréttatilkynningu.
Það eru hjónin Ólafía og Guðmundur sem veita þjónustustöð N1 á Hvolsvelli forstöðu. Þau fagna því að hraðhleðsla fyrir rafmagn bætist nú við þjónustu stöðvarinnar.
„Það veit hver maður að umferðin hefur aukist mikið. Þess vegna er ánægjulegt að sjá umhverfisvænni bílum fjölga líka og við viljum gera ferðafólkinu á þeim lífið auðveldara,“ segir Ólafía.
Á myndinni sem fylgir fréttinni eru (f.v.) Þorsteinn Fr. Sigurðsson framkvæmdastjóri Sjálfsbjargar, Guðmundur Elíasson og Ólafía Ingólfsdóttir stöðvarstjórar N1 á Hvolsvelli, Áslaug Thelma Einarsdóttir forstöðumaður einstaklingsmarkaða hjá ON, Guðný Rósa Þorvarðardóttir framkvæmdastjóri einstaklingssviðs N1, Bjarni Már Júlíusson framkvæmdastjóri ON og fremstur Bergur Þorri Benjamínsson formaður Sjálfsbjargar.