ON hraðhleðsla á Flúðum bætir þjónustuna við ferðamenn

Frá opnun hraðhleðslustöðvarinnar á Flúðum. Ljósmynd/Guðjón Hugberg

Það ríkti mikil tilhlökkun síðastliðinn föstudag þegar þau Guðmundur Sigurhansson og Margrét Runólfsdóttir á Icelandair Hotel Flúðir opnuðu fyrstu ON-hlöðuna á Flúðum.

Hlaðan stendur við Icelandair hótelið og blasir við um leið og komið er inn í þorpið. Þau Guðmundur og Margrét eiga og reka hótelið og hafa gert síðan 2001.

„Við lítum fyrst og fremst á ON-hlöðuna sem bætta þjónustu við ferðamenn sem heimsækja svæðið, jú og auðvitað við íbúa hér í hreppnum og nærsveitum“, segir Guðmundur.

Jón G. Valgeirsson, sveitarstjóri, segir að hlaðan á Flúðum eigi eftir að auðvelda ferðamönnum að ferðast á vistvænum bílum.

„Hlaðan á Flúðum er búin hraðhleðslum af tvennum toga og hefðbundinni hleðslu. Hrunamannahreppur leggur mikla áherslu á eflingu umhverfismála og einn liður í þeirri vegferð er að ferðafólk eigi nú betur með að ferðast á vistvænum bílum um svæðið er í takti við sýn heimamanna“, segir Jón.

Samfélagsleg ábyrgð að bjóða upp á öfluga hleðslu
„Hér er margt að skoða og gríðarlega stór hluti ferðamann á leið hér um. Það er sjálfsagt mál og ekki síst samfélagsleg ábyrgð okkar að bjóða upp á öfluga hleðslu fyrir þá sem hugað að umhverfinu“, segir Margrét.

Hlaðan á Flúðum er sú 47. í röðinni, en í tilkynningu frá Orku náttúrunnar segir að eitt af markmiðum fyrirtækisins sé að rafbílaeigendur geti ekið áhyggjulausir um landið, vitandi hvar næstu ON hlöðu er að finna.