Lögreglan á Suðurlandi stöðvaði fjóra ökumenn vegna gruns um ölvunarakstur í síðustu viku. Einn þeirra endaði akstur sinn úti í móa skammt frá Grímsborgum í Grímsnesi en slapp án alvarlegra meiðsla.
Tveir til viðbótar voru stöðvaðir vegna gruns um að þeir væru undir áhrifum fíkniefna eða lyfja við aksturinn.
Þá fóru 27 ökumenn yfir strikið á radarmæli lögreglunnar. Hraðakstursbrotin voru þrettán í Árnessýslu, átta í Rangárþingi og sex í Skaftafellssýslunum.