Ólafur Þór Ólafsson, bæjarfulltrúi í Sandgerði, gefur kost á sér í 2.-3. sæti í flokksvali Samfylkingarinnar í Suðurkjördæmi fyrir alþingiskosningarnar næsta vor.
Í tilkynningu sem Ólafur Þór sendi frá sér í dag segist hann hafa verið hvattur til framboðsins af fólki í kjördæminu.
„Það er mikilvægt að á Íslandi sé sterkur og breiður jafnaðarmannaflokkur sem leggur grundvöll að velferð og jöfnuði og ég vil leggja mitt af mörkum til tryggja að Samfylkingin sé það afl. Það hefur verið kallað eftir því að nýtt og kröftugt fólk gefi kost á sér til að takast á við þau fjölbreyttu og krefjandi verkefni sem íslenska þjóðin stendur frammi fyrir og ég tel að þar geti ég orðið að liði,“ segir Ólafur Þór í tilkynningunni.
Hann hefur víðtæka reynslu af sveitarstjórnarmálum, hefur setið í bæjarstórn Sandgerðisbæjar frá 2002 en hann leiddi lista Samfylkingar og óháðra borgara sem náði hreinum meirihluta í sveitarstjórnarkosningum 2010. Auk þess situr hann í stjórn Sambands sveitarfélaga á Suðurnesjum.
Ólafur Þór starfar sem forstöðumaður Fjölsmiðjunnar á Suðurnesjum auk þess að vera tónlistarmaður í hjáverkum. Hann er með BA-próf í stjórnmálafræði, hefur kennsluréttindi og er með MPA-gráðu í opinberri stjórnsýslu. Eiginkona hans er Katrín Júlía Júlíusdóttir og eiga þau þrjú börn.