Ólafur Elí Magnússon, íþróttakennari á Hvolsvelli, hlaut samfélagsviðurkenningu Rangárþings eystra 2026 en hún var afhent á Kjötsúpuhátíðinni um síðustu helgi.
Viðurkenningin er veitt þeim einstaklingum, fyrirtækjum, stofnunum eða félagasamtökum sem standa sig vel í að efla samfélagið, láta gott af sér leiða og eru öðrum góð fyrirmynd.
Markaðs- og menningarnefnd sveitarfélagsins var einhuga í ákvörðun sinni um að veita Ólafi Elí viðurkenninguna að þessu sinni og þakkar jafnframt fyrir þær fjölmörgu tilnefningar sem bárust frá íbúum.
Ólafur Elí hefur um áratugaskeið unnið mikilvægt starf fyrir samfélagið, þá sérstaklega í þágu barna, ungmenna og íþróttastarfs í sveitarfélaginu. Með elju, jákvæðni og ríkum vilja til að leggja sitt af mörkum hefur hann haft mótandi áhrif á kynslóðir íbúa. Hann er góður fulltrúi þeirra sem gera samfélagið betra með nærveru sinni og störfum, segir í greinargerð nefndarinnar.