Önnur fjölmennasta brautskráning í sögu FSu fór fram síðastliðinn föstudaginn í íþróttahúsinu Iðu. Að þessu sinni voru brautskráðir 158 nemendur af nítján námsbrautum.
Flestir stúdentarnir, 91 talsins, komu af bóknámsbrautum, 57 af öðrum brautum og 10 af verknámsbrautum með stúdentspróf að auki.
Bókaverðlaun voru afhent fyrir einstakar námsgreinar og dreifðust á marga nemendur en afar mjótt var á mununum hver yrði dúx. Á endanum var það Ólafía Ragnheiður Þórðardóttir frá Hvolsvelli sem stóð efst en fast á hæla hennar komu Dagný Katla Karlsdóttir frá Selfossi og Landeyingurinn Steinunn Lilja Guðnadóttir. Allar fengu þær styrk til frekara náms frá Hollvarðasamtökum FSu.
Í ræðu Soffíu Sveinsdóttur, skólameistara, kom fram að útskriftarhópurinn endurspeglaði vel hversu fjölbreytt nám væri stundað í FSu. Skólinn væri rúmlega þúsund manna samfélag þar sem „einstaklingar af mörgum kynjum, ýmsum þjóðernum, frá mismunandi landshlutum og með ólíkar skoðanir og væntingar. Það er mín framtíðarsýn að í FSu verði ávallt samfélag þar sem nemendur og starfsfólk fær að njóta sín á eigin forsendum.”
Við upphaf athafnarinnar söng kór FSu, Jóhannes Haukur Kristjönuson flutti ávarp nýstúdenta og Sigursveinn Sigurðsson, aðstoðarskólameistari, flutti annál annarinnar, sem gert hefur verið frá stofnun skólans. Margt áhugavert bar þar á góma eins og að námsárangur dagskólanemenda hafi verið góður því 85% eininga stóðust mat kennaranna.