Ökumenn víða í vandræðum – Sjúkrabíll fastur á Hellisheiði

Björgunarsveitir frá Hveragerði, Árborg og Þorlákshöfn eru nú að störfum á Hellisheiði þar sem fjöldi bíla sat fastur fyrr í dag, þar á meðal sjúkrabíll.

Verst var ástandið við Draugahlíð þar sem um fimmtán bílstjórar voru í vandræðum. Búið er að loka heiðinni og Þrengslum þar sem þar er mikil ófærð og afar slæmt skyggni.

Björgunarsveitin í Vík var kölluð út vegna bíls sem ók útaf vegi rétt við afleggjarann að Heiðarbæ og sveitirnar á Laugarvatni og Grímsnes-og Grafningshreppi eru á leið á Lyngdalsheiði. Þar situr rúta frá ferðaþjónustu föst eftir að hafa ekið út af veginum til að forðast árekstur við fólksbíl sem sat fastur. Farþegar rútunnar og bílsins verða líklegast fluttir á Laugarvatn en bílarnir skildin eftir. Veður á heiðinni er afar slæmt og mikill vindur gerir fólki erfitt að athafna sig.