Þyrla Landhelgisgæslunnar bjargaði ökumanni steypubíls af húsi bílsins eftir að hann fór útaf brú við Sultartangastöð á áttunda tímanum í kvöld og hafnaði úti í Þjórsá.
Ökumaðurinn var einn í bílnum og náði hann að komast af sjálfsdáðum út úr bílnum og upp á hús hans. Samkvæmt upplýsingum frá lögreglunni á Suðurlandi hafði hann ofkælst en var annars ómeiddur. Þyrlan flaug með manninn á Reykjavíkurflugvöll þaðan sem hann var fluttur með sjúkrabíl á bráðamóttöku Landspítalans í Fossvogi.
Lögregla, sjúkraflutningar HSU og björgunarsveitir í Árnessýslu voru kallaðar á vettvang ásamt þyrlu Landhelgisgæslunnar, sem var fyrst á staðinn.
Tildrög slyssins eru ókunn en lögreglan á Suðurlandi og Rannsóknarnefnd samgönguslysa rannsaka þau.
Ekki verður hægt að ná bílnum upp úr ánni fyrr en á morgun en Landsvirkjun mun minnka vatnsflæði í ánni til þess að auðvelda þau störf.
