Stjórn Samtaka sunnlenskra sveitarfélaga leggst alfarið gegn fyrirhugaðri virðisaukaskattshækkun á aðgang að baðlónum og krefst þess að hún verði dregin til baka. Fyrirhugað er að hækka skattinn úr 11% í 24%.
Í bókun stjórnar SASS segir að hækkunin ógni yfir 400 heilsársstörfum og ríflega 35 milljarða króna fjárfestingu á Suðurlandi. Þá sé ótalin sú óbeina og afleidda fjárfesting og fjöldi starfa sem skapast hefur vegna baðlónanna.
Mikilvæg undirstaða heilsársferðaþjónustu á Suðurlandi
Í tilkynningu frá SASS lýsir stjórnin yfir þungum áhyggjum af fyrirhugaðri hækkun en baðlón séu mikilvægur hluti af ferðaþjónustu og atvinnuuppbyggingu á Suðurlandi. Hafa beri í huga að hluti þessarar uppbyggingar hefur ekki enn opnað fyrir gestum og áhrif uppbyggingarinnar nái langt út fyrir fyrirtækin sjálf.
„Starfsemi baðlóna er ein mikilvægasta undirstaða heilsársferðaþjónustu í landshlutanum enda hafa þau opið allt árið um kring og laða þannig að gesti að vetri sem sumri. Baðlón eru ekki aðeins vinsælasta afþreying ferðamanna sem sækja Ísland heim heldur njóta þau jafnframt mikilla vinsælda meðal heimamanna og Íslendinga sem ferðast innanlands og heimamanna,“ segir í tilkynningu SASS.
Forsendur fjárfestinga brostnar án fyrirvara
Að sögn stjórnar SASS er tímasetning virðisaukaskattshækkunarinnar sérstaklega slæm þar sem baðlón landshlutans eru mörg hver nú í umfangsmiklum fjárfestingarfasa. Sum þeirra vinna að uppbyggingu nýrra áfangastaða með baðlónum en önnur stefna meðal annars á stækkun á núverandi starfsemi.
„Þær fjárfestingarákvarðanir sem liggja fyrir hafa verið teknar á grundvelli núverandi rekstrarumhverfis. Breyting sem þessi, án eðlilegs fyrirvara, setur forsendur fjárfestinganna og áætlanagerð baðlóna í uppnám til framtíðar. Hún hefur nú þegar gert það að verkum að uppbyggingaráform hafa verið sett í biðstöðu í landshlutanum og mun draga úr hvata og getu baðlóna til frekari fjárfestinga,“ segir í tilkynningu SASS og því hnýtt við að fyrirhuguð skattahækkun leggi heilsársstörf á Suðurlandi að veði og geti hæglega orðið þess valdandi að umsvif innan ferðaþjónustunnar sem og í öðrum atvinnugreinum dragist saman með tilheyrandi tekjutapi fyrir ríkissjóð.
Grefur undan uppbyggingu sveitarfélaga
„Sveitarfélög landshlutans eru ekki aðeins óbeinir áhorfendur að uppbyggingu baðlóna. Þau hafa lagt í umtalsverða vinnu og tekið á sig ýmsar skuldbindingar vegna skipulags, veitna og annarrar innviðauppbyggingar til að veita þeim brautargengi. Fyrirhuguð skattahækkun breytir ekki aðeins rekstrarumhverfi fyrirtækjanna heldur grefur jafnframt undan þeirri atvinnuuppbyggingu sem sveitarfélögin hafa stutt og fjárfest í,“ segir ennfremur í tilkynningunni frá SASS.