Ofsaveðri spáð á morgun við suðurströndina

Búist er við stormi (meðalvindi yfir 20 m/s) á landinu síðdegis á morgun og ofsaveðri (meðalvindi yfir 28 m/s) við Öræfajökul, Mýrdalsjökul, Eyjafjöll og í Vestmannaeyjum.

Það er hæglætisveður á landinu í dag, en á morgun syrtir í álinn, þegar djúp lægð (niður undir 940 mb) nálgast landið úr suðri.

Búist er við ofsaveðri (meðalvindur yfir 28 m/s) síðdegis á morgun með S-ströndinni. Hviður geta farið yfir 50 m/s við Öræfajökul og undir Eyjafjöllum. Úrkoma á þessum slóðum byrjar sem snjókoma, en færir sig yfir í slyddu með tilheyrandi krapa á vegum. Það verður því ekkert ferðaveður með S-ströndinni síðdegis á morgun. Versta veðrið verður syðst, en það hvessir einnig annars staðar á landinu og undir kvöld verður víða orðið norðaustan hvassviðri eða stormur (15-23 m/s) með skafrenningi og síðar snjókomu þegar úrkomubakkinn færir sig norður yfir landið.

Athygli er einnig vakin á því að á laugardaginn er útlit fyrir norðan storm með stórhríð á N-verðu landinu, en S-lands verða stöku él og skafrenningur.

Að lokum er útlit fyrir að lægi mikið á sunnudag og létti til, en þá má búast við talsverðu frosti.

Hægt er að fylgjast með vindaspánni á vef Veðurstofunnar en hún uppfærist fjórum sinnum á sólarhring og má alltaf sjá nýjustu kortin HÉR.

Fyrri greinSöngfuglar og kertagerð í listasafninu
Næsta greinNýr dýnuvöllur tekinn í notkun á Hvolsvelli