Starfsfólk Heilbrigðisstofnunar Suðurlands stóð vaktina yfir Þjóðhátíð í Vestmannaeyjum sem fyrr og tryggði öryggi gesta og íbúa með auknum viðbúnaði, öflugri mönnun og góðu samstarfi við viðbragðsaðila.
Ólíkt venjulegum helgum, þegar einn læknir er á bakvakt, var heilsugæslan opin allan sólarhringinn. Mönnunin byggðist bæði á öflugu heimafólki og starfsfólki HSU auk liðsauka frá Landspítala. Meðal þeirra var Hafdís, hjúkrunarfræðingur frá bráðamóttöku Landspítala, í þriðja sinn til starfa í sjúkraskýlinu í Herjólfsdal.
Í Dalnum voru sex sjúkraflutningamenn frá HSU við störf og tveir sjúkrabílar til taks. Röntgenþjónusta var á vakt alla helgina og rannsóknarstofa sömuleiðis. Öryggisverðir voru í móttöku allan sólarhringinn og starfsfólk eldhúss sá til þess að starfsfólk hefði aðgang að hressingu og heitum mat allan sólarhringinn. Þá lagði ræstingarfólk sitt af mörkum til að halda aðstöðunni hreinni og snyrtilegri þrátt fyrir mikla umferð.
Um helgina komu um 95 einstaklingar á heilsugæsluna og 52 leituðu í sjúkraskýlið. Þar tókst að sinna langflestum sem þangað komu og aðeins örfáir þurftu að fara áfram á heilsugæsluna yfir nóttina.
Á hverjum degi fór fram stöðufundur með fulltrúum heilsugæslu, sjúkradeildar, lögreglu, sjúkraflutninga, ÍBV, gæslu og sálgæsluteymis. Þar var farið yfir stöðu mála, lærdóm liðins sólarhrings og það sem mætti bæta til að tryggja sem best öryggi og þjónustu.
Þórunn Pálsdóttir er hjúkrunarfræðingur í Vestmannaeyjum. Hún var ein af þeim sem undirbjó og hélt utan um starfsemina á heilsugæslunni um helgina.
„Það er alltaf sérstök stemning sem fylgir því að vinna á Þjóðhátíð. Flestir eru í góðu skapi og allir leggja sig fram um að gera sitt besta. Við sem erum að vinna erum jafnframt mörg að undirbúa hátíðina með okkar fjölskyldum og mörg sinna einnig öðrum verkefnum fyrir ÍBV yfir helgina. Þegar helgin er að baki eru því flestir orðnir þreyttir, en jafnframt stoltir af góðu samstarfi og vel unnu verki,“ segir Þórunn.
