Ófært frá Lögbergi að Flosagjá

Veðurhamurinn síðustu daga hefur leikið innviði ferðaþjónustunnar á Þingvöllum grátt. Göngustígurinn frá Lögbergi og að Flosagjá verður að líkindum lokaður fram á vor þar sem að göngupallurinn hefur rifnað upp vegna flóða og jakaframburðar.

Mikil snjókeila hefur myndast undan Drekkingarhyl sem stýrir vatni í Öxará í nýja farvegi. Þetta er þó ekki óvenjulegt og hefur gerst áður. Tvö fræðsluskilti hafa losnað og rifnað af festingum, annað á Lögbergi og hitt við Silfru.

Einnig fauk hurðin í gestastofu á Haki illa upp í gærmorgun og brotnaði rúða og því verða gestir að ganga inn að austanverðu eða Almannagjár megin.

Á Facebooksíðu þjóðgarðsins kemur fram að skiltum og glerjun verður komið í vinnslu sem fyrst en einsog áður sagði verður ófært um tíma yfir ála Öxarár.