Rafskútuleigan Hopp opnaði deilileigu á Selfossi í gær. Það er Sigurgeir Skafti Flosason sem sér um rekstur Hopp á Selfossi en hann opnaði einnig Hopp í Hveragerði í síðustu viku og hafa viðtökurnar þar verið frábærar.
Nú eru 50 rafskútur frá Hopp komnar á Selfoss líkt og í Reykjavík mun Hopp á Selfossi sjá til þess að þjónustan gagnist heimamönnum fyrst og fremst. Fyrstu dagana munu nýir notendur sem sækja Hopp-appið fá fyrstu tvær ferðirnar sínar ókeypis.
„Markmiðið er að bjóða einstaklingum upp á umhverfisvænan, ódýran og handhægan ferðamáta til þess að komast leiðar sinnar á svæðinu. Við vonum að þessi þjónusta verði kærkomin viðbót við litríka og skemmtilega bæjarlífið hérna á Selfossi,“ segir Skafti í samtali við sunnlenska.is.
Þjónustusvæðið nær yfir allan Selfossbæ
Hopp ehf alíslenskt fyrirtæki sem býður upp á rafskútuleigu innan ákveðins þjónustusvæðis. Notendur aflæsa rafskútunum með appi og geta síðan keyrt um á þeim gegn vægu gjaldi. Þegar ferðinni er lokið er hægt að leggja rafskútunni hvar sem er innan þjónustusvæðisins, sem nær yfir allan Selfossbæ. Það kostar 100 krónur að aflæsa rafskútunum og hver mínúta í leigu þar á eftir kostar 30 krónur. Tíu mínútna ferð mun þá einungis kosta litlar 400 krónur. Einnig er hægt að setja rafskútuna í „pásu“ og kostar þá mínútan aðeins 20 kr.
„Við viljum biðja notendur þjónustunnar um að fara varlega og fylgja umferðarlögum. Einnig er mælt eindregið með því að fólk noti hjálma á meðan hoppað er um götur bæjarins,“ segir Skafti og bætir við að í appinu séu nákvæmar leiðbeiningar um þjónustuna og meðal annars kennt hvernig á að leggja rafskútunum að ferð lokinni þannig að þær verði ekki í vegi fyrir öðrum vegfarendum.
Hægt er að fylgjast með starfsemi Hopp á Suðurlandi á Facebook og Instagram undir nafninu Hopp Suðurland.
