Nýtt orgel borið inn í Þingvallakirkju um síðustu helgi. Um er að ræða lítið pípuorgel sem hefur að geyma heilar 192 pípur og fjórar raddir.
Greint er frá þessum viðburði á Facebooksíðu Þjóðgarðsins á Þingvöllum.
Gamla harmóníum orgelið, sem hefur staðið vaktina í Þingvallakirkju undanfarna áratugi, hefur verið flutt inn í skrúðhúsið í Þingvallabænum og gefur þar organistum tækifæri á að hita upp fyrir athafnir. Það var á sínum tíma gjöf frá börnum og tengdabörnum til minningar um hjónin Ásu Þorkelsdóttur (1886-1950) og Guðmund J. Ottesen (1869-1956) frá Miðfelli.
Sem fyrr segir er nýja orgelið pípuorgel, eða svokallað positíft orgel, og smíðað árið 1984 í Danmörku. Það stóð fyrstu áratugina í kirkjunni í Hruna en eftir endurnýjun á hljóðfærum þar fór það til Björgvins Tómassonar orgelsmiðs á Stokkseyri. Björgvin hefur skipt um vel flest sem þurfti að laga í orgelinu.
Ástæða þess að hægt var að kaupa nýtt orgel er fyrst og fremst að þakka minningarsjóði Guðbjargar Einarsdóttur frá Kárastöðum en hún lést árið 2004. Markmið sjóðsins var að efla tónlistarflutning í Þingvallakirkju og fyrstu ár minningarsjóðsins var hann nýttur til að halda tónleikaröð á þriðjudagskvöldum á sumrin í Þingvallakirkju árin 2007-2017.
Eftir að tónleikaröðinni var hætt var ákveðið að láta það fé sem eftir var renna í kaup á nýju orgeli. Guðbjörg spilaði nefnilega á sínum yngri árum á orgelið við messur í Þingvallakirkju. Innihald sjóðsins ásamt góðum framlögum vina og vandamanna Þingvallakirkju gerðu það mögulegt að kaupa loks nýtt orgel.