Samkomulag var í dag undirritað um nýbyggingu sem hýsa mun nýtt hjúkrunarheimili og heilsugæslustöð í Vík í Mýrdal. Ráðgert er að byggingin rísi á lóð við Sléttuveg 11 sem sveitarfélagið úthlutar til ríkisins. Húsnæðið verður hannað og byggt af þriðja aðila gegn langtímaleigusamningi við ríkið.
Inga Sæland, sem fer með uppbyggingu hjúkrunarheimila og Alma D. Möller, heilbrigðisráðherra, heimsóttu Vík í dag og undirrituðu samkomulagið ásamt Einari Frey Elínarsyni, sveitarstjóra Mýrdalshrepps.
Stór dagur fyrir Mýrdalshrepp
„Þetta er stór dagur fyrir Mýrdalshrepp og tímamót í uppbyggingu mikilvægrar grunnþjónustu í sveitarfélaginu. Nýtt hjúkrunarheimili og ný heilsugæsla við Sléttuveg munu bæta aðbúnað íbúa, styrkja starfsumhverfi heilbrigðisstarfsfólks og tryggja að þjónustan þróist í takt við þarfir samfélagsins til framtíðar. Við höfum lengi lagt áherslu á að hér þurfi nútímalegt húsnæði fyrir þessa lykilþjónustu og það er afar ánægjulegt að sjá þessi áform nú taka á sig skýra mynd. Ég vil þakka ráðherrum og fulltrúum ríkisins fyrir gott samstarf og ríkan vilja til að standa með samfélaginu hér í Vík,“ segir Einar Freyr Elínarson, sveitarstjóri í Vík.
Samlegðaráhrif á Sléttuvegi
Nýja hjúkrunarheimilið mun leysa af hólmi hjúkrunar- og dvalarheimilið Hjallatún sem var opnað árið 1989. Þar eru í dag 18 hjúkrunarrými en nýja heimilið verður stærra með góðri aðstöðu fyrir íbúana. Núverandi húsnæði uppfyllir ekki nútímakröfur um aðbúnað vegna reksturs á hjúkrunarheimilum. Brýnt er meðal annars að tryggja íbúum aðgang að einstaklingsrýmum með baðherbergi.
Húsnæði heilsugæslunnar í Vík er komið til ára sinna og samkvæmt þarfagreiningu hvorki raunhæft né hagkvæmt að ráðast í endurbætur á því. Þess vegna hefur verið ákveðið að tryggja starfseminni nýtt og nútímalegt húsnæði sem uppfyllir kröfur um gæði, hagkvæmni og þróun þjónustunnar til næstu ára. Úr varð að sameina nýtt húsnæði fyrir hjúkrunarheimili og heilsugæslustöð í einni byggingu með það fyrir augum að í því felist samlegðaráhrif við framkvæmdirnar og þar með hagstæðara leiguverð. Framkvæmdasýslan – Ríkiseignir munu á næstunni efna til útboðs á framkvæmdinni.
