Framboðið Betri sveit – fyrir okkur öll mun bjóða fram lista í komandi sveitarstjórnarkosningum í Grímsnes- og Grafningshreppi.
Andrés Bertelsen verður oddviti listans en aðrir frambjóðendur verða kynntir á næstu vikum, ásamt helstu stefnumálum framboðsins. Andrés er fæddur og uppalinn á Silfrastöðum í Skagafirði. Hann útskrifaðist með skipstjórnargráðu frá Tækniskólanum árið 2014 og hefur starfað við alþjóðlega markaðssetningu, fjölmiðlun og hönnun flókinna tæknikerfa. Andrés starfar nú við hugbúnaðarþróun í alþjóðlegu nýsköpunarverkefni. Hann býr ásamt sambýliskonu sinni í Grímsnes- og Grafningshreppi, tvö eldri börn þeirra eru uppkomin en tvö þau yngri stunda nám við Kerhólsskóla.
Í tilkynningu frá Betri sveit segir að framboðið muni hafa það að markmiði að stjórnsýsla sveitarfélagsins verið opnari, stuðlað verði að sanngjörnum ákvörðunum sem byggja ætið á hagsmunum samfélagsins í heild. Lögð verður áhersla á skýrt utanumhald um framvindu verkefna og þeirra málefna sem sveitarfélagið stendur að eða stendur frammi fyrir.
„Betri sveit vill aukið samráð. Vilja íbúa má meðal annars kanna með ráðgefandi íbúakosningu. Markmiðið skal ætíð vera að efla með markvissum hætti lýðræðisleg vinnubrögð í sveitarfélaginu, verja fé til framkvæmda eftir forgangsröðun íbúanna sjálfra og með hagsmuni heildarinnar að leiðarljósi,“ segir í tilkynningu frá Betri sveit.