Úrskurðarnefnd umhverfis- og auðlindamála hefur fellt úr gildi ákvörðun bæjarstjórnar Sveitarfélagsins Árborgar um nýtt deiliskipulag fyrir hesthúsahverfið á Selfossi.
Sveitarfélagið deiliskipulagði hesthúsalóðir samhliða íbúabyggð í uppbyggingu en Fagraland ehf, sem stendur að uppbyggingu íbúðahverfisins í Dísarstaðalandi kærði deiliskipulagið og tók úrskurðarnefndin málið fyrir á fundi sínum í dag.
Eftir að deiliskipulagstillagan var auglýst í fyrra bárust hátt í þrjátíu athugasemdir frá íbúum og hagsmunaaðilum í nágrenninu og lutu þær einkum að nálægð fyrirhugaðrar hesthúsabyggðar við íbúðarbyggð, lyktarmengun, rykmengun og öðru ónæði. Í kjölfarið voru gerðar smávægilegar breytingar á skipulagstillögunni og t.d. skerpt á skilmálum um förgun taðs og aðra umgengni á svæðinu.
Í niðurstöðu úrskurðarnefndarinnar segir að sökum áhrifa við nálæga íbúðarbyggð hefði verið tilefni til ítarlegri umfjöllunar um umhverfisáhrif nýja skipulagsins með tilliti til lyktar, rykmyndunar, umferðarálags og fleiri þátta.
„Þrátt fyrir að flestum megi vera kunnugt um að slíkra umhverfisáhrifa geti gætt af húsdýrahaldi og að hið umþrætta deiliskipulag er í samræmi við gildandi aðalskipulag, leysir það ekki sveitarstjórn undan þeirri skyldu sinni að gera grein fyrir umhverfisáhrifum deiliskipulags, eftir besta megni,“ segir í úrskurðinum en í greinargerð sveitarfélagsins með deiliskipulaginu hafi að mestu verið sneitt hjá því að fjalla um umhverfisáhrif skipulagsins.
Engin framtíðarsýn
„Þetta svæði er skipulagt undir hestamennsku en ekkert tillit var tekið til þess að þarna sé íbúabyggð í nágrenninu og það er eitthvað sem maður gat ekki gert ráð fyrir,“ segir Hannes Þór Ottesen, framkvæmdaraðili Fagralands ehf, í samtali við sunnlenska.is og hann fagnar úrskurðinum.
„Það er skylda sveitafélagsins að aðlaga hesthúsabyggðina að umhverfinu og þeim sem þegar hafa byggt upp sínar fasteignir í trausti fyrri ákvarðana. Það er slæmt að vinnubrögð meirihluta bæjarstjórnar sé með þessum hætti og það er skylda bæjarstjórnarinnar að horfa fram í tímann í allri skipulagsvinnu. Það gengur ekki að hér í sveitarfélaginu valti meirihluti bæjarstjórnar yfir allt og alla og hunsi lög og reglur,“ segir Hannes ennfremur.
„Í mínum huga er engin framtíðarsýn í þessu, umferð um Gaulverjabæjarveginn á eftir að margfaldast með nýjum hverfum sunnan Suðurhóla. Ég myndi vilja sjá sveitarfélagið hefja uppbyggingu nýs hesthúsahverfis þar sem er nægt landrými og hestamennskan fær að vaxa og dafna,“ sagði Hannes að lokum.