Í gær var formlega opnað nýtt bráðarými á bráðamóttöku Heilbrigðisstofnunar Suðurlands á Selfossi ásamt endurbættri aðkomu fyrir sjúkrabíla.
Markar opnunin endi á umfangsmiklum endurbótum á bráðamóttökunni sem ætlað er að styrkja bráðaþjónustuna og bæta aðstöðu bæði sjúklinga og starfsfólks.
„Þessi opnun er mikilvægt skref í áframhaldandi uppbyggingu heilbrigðisþjónustu á Suðurlandi. Bak við hverja framkvæmd sem þessa stendur öflugt starfsfólk sem sinnir krefjandi verkefnum allan sólarhringinn. Nýja aðstaðan er mikilvæg viðurkenning á því starfi,” sagði Díana Óskarsdóttir, forstjóri HSU, við opnunina.
Díana sagði enn fremur að með bættri aðstöðu fyrir sjúklinga, starfsfólk og sjúkraflutningamenn styrkir HSU við getu sína til að veita örugga og skilvirka bráðaþjónustu fyrir íbúa svæðisins og þá fjölmörgu gesti sem sækja Suðurland.
Aðstaða sjúklinga og starfsfólks er orðin hin glæsilegasta auk þess sem aðgengi sjúkraflutningamanna að bráðamóttökunni er með besta móti, og er nú orðið skilvirkara og öruggara.
