Nýsköpunardagur Heilbrigðisstofnunar Suðurlands verður haldinn á Hótel Selfoss þann 10. september nk. kl. 13:00.
Á Nýsköpunardeginum verður sjónum beint að nýsköpun, þróunarverkefnum og rannsóknum innan stofnunarinnar. Gestir fá innsýn í spennandi verkefni starfsfólks, læra um nýjar lausnir í heilbrigðisþjónustu og þá þróun sem mótar framtíð heilbrigðisþjónustu fyrir íbúa á Suðurlandi.
Á dagskrá verða mörg áhugaverð erindi og kynningar á verkefnum starfsfólks sem endurspeglar þá framsækni, kraft og hugvit sem býr innan Heilbrigðisstofnunar Suðurlands.
Meðal erinda eru til að mynda fyrirlestrar lækna sem nýta ólíkar gervigreindarlausnir, annars vegar í móttöku á heilsugæslu og hins vegar við lestur myndgreiningar á bráðamóttöku og hvernig tæknin hefur bæði aukið afköst þeirra í vinnu og bætt öryggi sjúklinga. Einnig verður kynning á Kraftmiklum krökkum sem er lífsstílsúrræði á heilsugæslunni fyrir börn með offitu og fjölskyldur þeirra.
Viðburðurinn er opinn öllum og verður einnig sýndur í beinu streymi. Hægt verður að nálgast streymið á heimasíðu eða á samfélagsmiðlum HSU á meðan viðburði stendur.