Brunavarnir Árnessýslu í Þorlákshöfn fengu afhentan nýjan og glæsilegan tankbíl síðastliðinn föstudag, sem eflir tækjakost BÁ í neðri hluta sýslunnar til mikilla muna.
Nýi bíllinn, sem er af gerðinni Scania, leysir af hólmi 37 ára gamlan Mercedes Bens tankbíl með 8.000 lítra tanki, sem eins og margir eldri tankbílar slökkviliðsins þjónaði fyrst sem mjólkurbíll hjá Mjólkurbúi Flóamanna.
„Nýi bíllinn er 500 hestöfl með drifi á öllum hjólum, það er á honum 13.000 lítra vatnstankur og sundlaug, sem þýðir að við getum losað af bílnum og skilið eftir vatn í laug og sótt meira. Hann eykur getu okkar til slökkvistarfa bæði hér í þéttbýlinu og í dreifbýlinu í kring til mikilla muna,“ segir Lárus Kristinn Guðmundsson, varaslökkviliðsstjóri, í samtali við sunnlenska.is
„Hann mun reyndar nýtast allri sýslunni, það er þannig hjá okkur að ef það vantar vatns- eða dælubíla á önnur svæði þá köllum við til bíla af öðrum stöðvum. Og oft á tíðum ef við erum í stórum verkefnum þá þurfum við bara alla okkar tankbíla,“ segir Lárus ennfremur og bætir við að stöðin í Þorlákshöfn sé öflug eining.
„Við erum vel tækjum búin hérna. Við erum með dælubíl með klippubúnaði og öllum þeim búnaði sem þarf í kringum slökkvi- og björgunarstarf. Síðan erum við með mannskapsbíl og dælukerru. Svo erum við að fá inn hérna fimm nýja slökkviliðsmenn sem eru núna í þjálfun. Það verða þá tuttugu slökkviliðsmenn sem tilheyra þessari stöð. Það veitir ekki af, það er búin að vera rosalega hröð uppbygging hérna í Ölfusinu á bæði íbúðar- og atvinnuhúsnæði og við verðum að halda í við það,“ sagði Lárus að lokum.
