Búið er að undirrita nýjan fimm ára þjónustusamning milli Náttúrulækningafélags Íslands og Sjúkratrygginga Íslands um þverfaglega endurhæfingu fyrir sjúkratryggða einstaklinga.
„Það er mikið fagnaðarefni að þetta skuli loksins vera í höfn,“ segir Ingi Þór Jónsson, markaðsstjóri hjá Heilsustofnun NLFÍ í Hveragerði. Hann segir óvissu og erfiðu tímabili lokið fyrir starfsfólk stofnunarinnar.
Á samningstímanum bætist við þjónusta til þeirra einstaklinga sem þurfa þyngri endurhæfingu í kjölfar sjúkrahússvistar eða vegna tiltekinna sjúkdóma.
Þá verður aukin þjónusta til almennings kynnt á næstunni en ýmsir möguleikar eru í boði, s.s. heilsudvöl í lengri og skemmri tíma auk lækningatengdar ferðaþjónustu.
Ekki verður lokað fyrir hefðbundna þjónustu yfir sumartímann eins og gert var í fyrrasumar en þá var rekið hótel á stofnuninni.