Ölvisholt Brugghús, sem er eitt af fyrstu handverks brugghúsum landsins, hefur verið selt til nýrra eigenda sem hafa tekið við rekstrinum og ætla sér stóra hluti á næstunni.
Ölvisholt hefur bruggað gæðabjóra frá árinu 2007 og hefur náð góðum árangri á bjórsýningum bæði erlendis og hér heima.
Í tilkynningu frá kaupendahópnum segir að á bakvið kaupin standi samhentur hópur sem hefur hug á að efla reksturinn til muna og halda áfram að þróa gæðabjóra. Hópurinn samanstendur af Jörundi Jörundssyni, Þór Bæring Ólafssyni, Guðmundi Hreiðarssyni, Braga Hinriki Magnússyni, Einari Sigurðssyni og Berglindi Snæland.
Elvar Þrastarson verður áfram bruggmeistari Ölvisholts en hann hefur starfað hjá Ölvisholti í þrjú ár. Meðal annars er stefnt að því að auka vöruúrval og koma reglulega með nýja bjóra á markað. Meðal nýjunga hjá Ölvisholti er nýr gæðabjór sem bruggaður var sérstaklega fyrir bjórhátíðina á KEX sem hefst 24. febrúar.
Samstarfsaðili Ölvisholts á Íslandi er Karl K. Karlsson en fyrirtækið sér um alla dreifingu og markaðssetningu á vörum Ölvisholts á Íslandi. Einnig er Ölvisholt með öfluga samstarfsaðila í Svíþjóð og Bandaríkjunum og á næstu vikum verða kynntir fjölmargir nýir erlendir samstarfsaðilar.